勒拉前頭，吾曾經寫過一篇《如風往事之－－漫談上海人乘風涼》（上海故事），等到兩天以后，吾又畀文章改寫成為《如風往事之－－講講上海人乘風涼》（滬語故事），后頭一篇文章吾是采用滬語方言俚語唻寫作個，所講個內容就是老底子個上海、勒那些天氣邪氣炎熱個夏日季節里向，上海人又是哪能去“乘風涼”避暑個。【備注：“乘風涼”一詞是屬于吳地個方言土語，普通話意思就是“納涼”。】
對于迭篇文章，吾就決定講一講有關于“拖油瓶”迭樁事體哦！吾今早仔要寫個迭篇文章搭之前個文章到底會有哪能一種關系啊？！之所以吾會去寫關于“拖油瓶”文章，吾認為主要原因有其二。
第一個原因是：隨著時代個覅斷變遷搭發展，“拖油瓶”迭個詞語已經嘸沒人再會去講講個，幾乎可以講是“消亡”，只有某些老一輩個上海人，至少是阿爺搭阿奶一輩個老年人，千年難扳會講講個。恐怕今早仔個年輕一代，就覅一定曉得“拖油瓶”一詞個意思。
第尼個原因是：吾勒撰寫有關于上海人是哪能唻乘風涼個文章當中，有去記錄老底子上海人，還勒乘風涼個辰光，是交關歡喜嘎“嘎訕胡”談“談山海經”是有關系個，勒拉期間會講到“拖油瓶”！【備注：“嘎訕胡”搭“談山海經”兩組詞普通話就是講“聊天”。】
吾勒撰寫上海人乘風涼個文章當中，有關于“嘎訕胡談山海經”個內容，吾是迭能唻講個，意思是講：乘風涼個辰光，嘎訕胡談山海經是覅可缺少個一項活動，鄰舍隔壁之間自然就會分享各類趣聞軼事，還有覅少個家庭還會張家短李家長，拿其他人個某些丑事儕講出唻，吾有一位曾經個鄰居加同學徐濤，就是迭能樣子個，就因伊長得活脫似像一個外國佬，伊個爺娘覅是外國人，儕會畀大家唻講！……
上段文字記錄個內容，是發生勒吾伲一家四口已經搬遷住進掰搿辰光由“房管所”建造個新工房，勒拉迭個前頭所居住個房子是房管所個私房。所住個房子呈現近乎“L”形狀，層高是六層樓個房子，有三個門洞，一樓三戶人家，共計有五十四戶人家。【備注：老底子“房管所”，即今早大家所講個“房管局”，只畀過調換一個名稱！】
勒拉掰搿辰光，所居住個新工房，有三分之一是原拆原還個原住居民，吾個家庭就是屬于原拆原還個原住居民，還有三分之二個居民，儕是從事各類搭石化行業有關系個普通工人。仍舊勒拉掰搿辰光，盡管每戶人家儕安裝電風扇，基本浪向每戶人家儕有兩臺電風扇，只因勒新工房前頭有一塊大場地，盡管每年進入到夏季時節個辰光，天氣是炎熱個，基本浪向每天依舊會有邪氣大個穿堂風穿堂而過，每每一到夏日時節個傍晚，辰光基本浪向勒傍晚五點鐘到七八點鐘之間，還會有邪氣多個鄰居出唻乘乘風涼，邊吃夜飯邊嘎訕胡談山海經。
大家主要調侃伊拉個大致意思是勒講，吾個同學徐濤長得像一個外國人，黃頭發，眼睛是一藍一黃個，伊個爺娘并覅是外國人，還講伊個姆媽肯定是勒外頭，搭一些勿三勿四個人，七搭八搭搞七廿三生出唻個，伊“肯定覅是伊拉爺老頭子生出唻”個，伊拉爺老頭子一定會尋找伊個姆媽算總賬，伊就是伊個姆媽“拖油瓶”拖唻個……
吾還能清爽個記得勒拉掰搿辰光，勒乘風涼嘎訕胡談山海經個辰光，“拖油瓶”個次數搭內容是講得邪氣多，基本浪向每年到入夏時節，天天儕要去講講個，而且其他人是覅會去講講個，就是盯牢吾曾經個鄰居徐濤去講，是開玩笑個去講，伊還是吾個小學同學，講得辰光一長久而久之，儕畀老繭也聽出唻，已深深個印勒腦海里向！
為啥要去講曾經個鄰居（同學）徐濤呢？！只因為伊搭其他人是有得邪氣明顯個區別，伊長得活脫似像一個外國佬，皆是因為伊本人從小到大，一直要到還嘸沒開始發育個前頭，頭發是金黃色個，通常情況唻講，正常人個眼睛，眼烏子是黑色，眼底是白色個，然而伊個眼底搭其他人是有所覅同個，很像波斯貓個顏色，伊個一只眼睛個眼底是藍顏色個，另外一只眼睛個眼底是黃顏色個，而且伊個鼻頭大而堅挺像一只大蒜，伊個爺娘儕始終認為迭個是一種覅好個毛病，一定要想方設法去看好病，每隔幾年就帶伊去滬上各大醫院求診看病、遍訪各處個名醫，卻始終儕嘸沒去看好。至發育開始頭發逐漸勒金黃色中夾帶有黑顏色，沒過多久吾家搬遷到另外一個城鎮上居住，彼此之間也就失去聯系，至于以后是否儕是變成黑色，吾是覅曉得個。
正是因為伊搭其他人有與眾覅同個地方，所以講伊搭伊個家庭，儕會勒夏季乘風涼，成為大家嘎訕胡談山海經調侃個好對象，只要是去調侃伊搭伊家庭個人，彼此之間覅僅是屬于交關熟悉個，而且還是知根知底，已經是相處有十幾年個老鄰居，盡管每趟伊搭伊個爺娘經過個辰光，總歸要畀大家調侃一番，伊拉始終儕嘸沒氣惱過，僅僅以微笑個態度回應大家。吾個爺娘曾經對吾以及大吾五歲個親大哥教育過，講迭能去做個人，就是屬于邪氣推扳個一樁事體，如果倷兄弟兩也跟著去做，就是嘸沒素質個人，還會責怪爺娘嘸沒教育好倷兩人，其他人去做，就讓伊拉去做好勒，吾伲就覅要跟著一道去做！……故而吾伲一趟儕嘸沒調侃過伊拉，也嘸沒隨波逐流個去隨聲附和。
勒拉前頭，吾花費有交關多個筆墨勒拉講關于“拖油瓶”迭個詞語，嘎么，像“拖油瓶”迭個詞語，伊到底又是哪能唻個呢？！據吾所查閱到各種歷史資料以后，儕讓吾曉得并弄明白迭個詞語個出處，“拖油瓶”迭個詞語，最早就是出現勒吾伲國家歷史浪向個明朝末年時期，就勒明朝末年，凌玄房凌濛初編著有擬話本小說集《初刻拍案驚奇》一書，就勒書籍當中，還勒卷三十三中，伊是迭能唻講到個，講道：“天祥沒有兒女，楊氏是個二婚頭，初嫁時帶個女兒來，俗名叫做'拖油瓶’。”覅僅是迭能哦，勒吾伲國家歷史浪向清朝末年，李伯元李寶嘉撰寫有《官場現形記》一書，就勒卷40當中，伊也唻講道：“不是你父親養的，難道是你娘拖油瓶拖來的嗎？”勒吾伲國家近代中國，著名個出版家鄒韜奮撰寫有《萍蹤寄語》一書，勒《萍蹤寄語三集》中寫道：“像我國所謂'拖油瓶’的侮辱婦女和孩子的極端野蠻無理名詞，是在男女平等的社會里是不容存在的。”……
像“拖油瓶”迭個詞語，實際浪向就是指從前個中國人，歷朝歷代同樣也是要包括勒其間個，對于各式各樣個原因，需要另外再去改嫁個婦女（人），而且還是帶有小囡個，“一種十分歧視性個稱呼”。就勒吾伲國家個古代社會，至少一直要保持到民國時期，對于一些需要再嫁個婦女（人），一律儕統稱伊拉為“再蘸”。對于搭前夫所生個小囡，畀帶到后夫個屋里向去勒以后，一律俗稱為“拖油瓶”。
畀過，吾自家則是迭能唻看待、認得并去認為“拖油瓶”迭個詞語個，吾一直以為絕對是畀大家以訛傳訛哦，而且還帶有一些誤解個成分勒里向，認為只有再嫁個婦女（人），而且還是屬于有小囡個婦女（人），儕是會去使用迭個詞語，是屬于迭個一類人個專用名詞。
其實不然并覅是迭能樣子個，伊最為正確個講法就是應該畀叫做“拖有病”迭個詞語，而并覅是“拖油瓶”迭個詞語哦。就勒吾伲國家個古代社會，歷朝歷代，從上到下，一直勒講啥個“三綱五常”，覅管是身處勒何種社會階層里向個婦女（人），等到自家個男人駕鶴西去以后，就堅決覅可以再去嫁啥個男人個，既覅管迭個婦女（人）個年齡有幾何，也覅管迭個婦女（人）個年齡，到底歲數是屬于邪氣大，還是歲數是屬于交關小，儕是一致要求婦女（人）去守一輩子個活寡，守活寡一直要守到婦女（人）駕鶴西去為止，迭個就是吾伲國家古代個法律法規、一個道德標準搭行為準則，一旦有出現再嫁個婦女（人）以后，自然就是覅需要多去講一眼啥么事個，會畀絕大多數多個人或家庭看覅起個，還要畀大家議論紛紛說三道四指指點點一番……
畀過，對于吾伲國家歷史浪向、歷朝歷代個婦女（人）唻講伐，基本浪向可以講嘸沒啥個收入唻源，也是覅大可能外出去打工養活自家個，因此講有些婦女（人）因為迭能搭伊能個種種原因，還只為能夠更好個生存下去，覅得覅另外再去嫁一個男人，迭個也是屬于無可非議個一樁事體，一般能夠迭能去做個婦女（人），像迭能一類人家家境儕是屬于邪氣推扳個。勒拉掰搿辰光，天災人禍也是屬于交關頻繁個，一旦寡婦所帶唻個子女，到新個夫家以后，要是有啥個三長兩短，往往就會引起前夫屋里親屬覅停歇個刁難搭責難。對于后夫個家庭唻講伐，只為避免產生迭能一類個糾葛搭紛爭，往往勒娶寡婦做自家個正妻或小妾個閑話，自然就要去邀請一個覅相關、嘸沒絲毫利害關系個人，訂立下一個字據，講清爽前夫子女唻到吾屋里向，就已經是屬于一個有病個人，今后一旦有遭遇到啥個覅測個辰光，搭后夫則是嘸沒關系個。因而大家就把再嫁婦女個子女稱之為“拖有病”。由于“拖有病”搭“拖油瓶”字音極其相近，因而畀大家講“拖油瓶”。
其實，勒吾伲國家歷史浪向個古代婦女（人），伊要是另外再去嫁一個男人，可以講就是屬于萬不得已、不得已而為之、窮途末路個一樁事體，伊如果覅是走到最后要緊關頭個閑話，絕對是覅會得去走迭條路個，伊本人對于自家是覅會去考慮一眼啥么事個，最為主要個一個原因為個就是－－為自家個子女去做一個打算搭考慮、能有一個依靠，但凡是一定要迭能唻做個婦女（人），勒絕大多數個情況下頭，子女從小就失去自家個爺老頭子，姆媽又是嘸沒啥個經濟唻源個，只有邪氣少數個婦女（人），迭些人個爺娘因為過日腳實在是過覅下去以后，覅是一條路浪向個人，雙方只好以離婚個方式收場，加之男方是覅大歡喜女孩子，畀女孩子判畀女方。女方只為能夠生存并存活下去，只好另外再去嫁男人，畀小女孩一道帶過去。還因為勒吾伲國家歷史浪向古代社會，絕大多數個婦女（人）是屬于家庭婦女搭附屬品，也是嘸沒工作畀伊去做個，除忒嫁男人，是嘸沒其他好辦法個。就像上述迭種情況，勒拉吾伲國家個古代時期，概率也是屬于邪氣小個。
勒老底子個辰光，男人要是自家個妻子駕鶴西去以后，至少到民國前頭，可以重新再娶一個妻子，像迭種做法就畀叫做“續弦”，婦女（人）要是自家個男人駕鶴西去以后，要是再去尋覓一個丈夫，既是覅可以個，也是屬于邪氣困難個，除忒會畀大家群起而攻之議論紛紛說三道四一番以外，搞覅好，還有可能畀眾人捆綁起唻，關進籠子里，再勒籠子個里向放上重磚（石）頭，沉到江底下頭淹死，成功個概率也是相當低個，但并覅表示嘸沒，多多少少還有一眼眼個！
從民國開始就沒關系，婦（女）人搭今早個男人過覅下去就可以離婚，還可以再去尋找另外合適個男人嫁畀伊，覅允許嫁男人就講得交關少勒，甚至還有專門為迭種類型個婦人（女）做媒人個人！
今早因開放、人個思想也跟著進步，老百姓對于各種情況見得較多，尤其是結婚搭離婚變得交關多，更是見怪覅怪個一樁事體。勒老底子“拖油瓶”主要是指“女方搭前夫生個小囡帶到后夫屋里向”，實際男方勒再婚個辰光，有可能帶著搭前妻生個小囡，也好稱之為“拖油瓶”，所以“拖油瓶”就覅單單是針對女方，也可以指男方。
但凡是“拖油瓶個人家”，也是嘸沒辦法個一樁事體，“拖油瓶”伊從小就失去勒爺老頭子，萬不得已只好跟自家個姆媽去重新認一個男人作為“自家個爺”，既覅管伊是一個男小囡，還是一個女小囡，也覅管日腳是過得邪氣好，還是過得交關推扳個，伊本人個身世已經是屬于“殘古作孽”個一樁事體，吾伲就覅要再去講點啥么事，也是覅應該取笑迭種類型個人，就像迭種做法也是屬于覅大對頭個！
畀過，話雖然是迭能唻講個，果真要迭能去做個閑話，還是蠻難、相當有困難個，有許許多多個人（群），還是會得針對迭種類型個家庭，要去說三道四、竊竊私語、流言蜚語、評（品）頭論足一番……
自然會有一部分人家，始終勒畀大家嘲笑、鄙視搭陰影下頭，艱辛生存著，因為覅堪忍受，性格一步一步個向極端走去，從此以后就開始自暴自棄仇視周遭搭社會，尋到好時機時就開始報復社會。
也有勒拉各個方面儕是邪氣好個拖油瓶家庭，通過個人自強不息搭努力，刻苦自律、時刻激勵著自家，能夠從逆境中崛起，成為一代偉人搭宗師。比方講，勒吾伲國家歷史浪向，最出名個拖油瓶人家，還是要數北宋時期個思想家、政治家、文學家范希文范仲淹。就勒伊兩歲個辰光伊個爺因生病亡故，姆媽謝氏是嘸沒收入搭依靠個，邪氣貧苦覅堪，當就快要活覅下去個辰光，只好帶年幼個尼子改嫁畀掰搿辰光平江府推官朱文翰，搭繼父姓改名為朱說，于1009年離家到長白山醴泉寺借讀，邁開伊改變自家命運個第一步路。有一句成語叫做“劃粥斷齏”，所講述個內容就是范仲淹勒拉小辰光苦讀書個故事。
當歷史個這部列車駛入到1015年個辰光，范仲淹通過自家覅間斷個勤奮努力，考中進士并進士及第，畀姆媽接到自家個身邊歸養，迭個還覅算啥個，后唻等到伊過29歲生日個辰光，又重新啟用“范”姓迭個姓氏，迭個辰光個范仲淹已成名交關有名氣，寫出交關多膾炙人口個好文章，最出名個文章還是要數《岳陽樓記》，“先天下之憂而憂，后天下之樂而樂”……千百年唻，覅曉得畀多少心懷大志個人所引用，伊還直言不諱個向世人宣布，自家就是屬于一個拖油瓶個身份！
【備注：①：文章為作者原創；②：各類和文章有關個圖片儕是唻源于網絡上頭；③：萬分感謝原創圖片】
杜老倌俠客居（陸偉）寫于2018年08月19日禮拜日夜里向
