阿拉老底子每天呈送精彩文章一組
打開塵封的記憶，尋覓往昔的歲月
敘老底子事 憶老底子人
訴老底子情
侯寶良
一場秋雨，一陣涼。有天，我跟老婆辣銀行辦完事，別轉頭就走。聽得身后傳來一聲聲親切關照：“阿姨爺叔慢慢走。”頓時立刻讓阿拉心里感覺暖意濃濃。
秋雨瀟瀟，道路濕滑，撥老年人一個溫馨個提醒交關重要。近腔頭骨傷科個醫生朋友也帶信撥我，講要當心跌跤，伊以第一手資料說話，迭個時段是老年人出事體個高發辰光。勿少老人家平常精神抖擻，結果摜一交就勿來三了，搿倒勿是危言聳聽，類似個事體年年有。記得2013年上海疾病預防控制中心舉辦過一次“預防老年人跌跤”個征文，我就寫過一首順口溜，從多方面來講防跌跤個要訣跟關切，還得過獎。再撥大家一道來分享：
撐根拐杖作依靠。
慢慢下蹲覅焦躁。
碰到困難多照料。
覅求時髦覓輕巧。
“秋風秋雨愁煞人”是形容多事之秋。七老八十也算到了人生之秋，好生善待啊。“昨日黃花昨日昏，今朝風雨豈無晴”，叫聲“阿姨爺叔慢慢走”，搿閑話提醒得好。“歲數勿饒人要服老，腿腳勿便少跑跑”，少跑勿是覅跑，就是講走路要當心。老年人走路應該挺胸抬頭，但勿要昂首闊步，左顧右盼、謹慎行走才是必須個。軋道（結伴）同行時“相互攙扶有情調，碰到困難多照料。”有需要幫助個辰光，一定勿要逞強，坦然接受、留個微笑，開口感謝，讓迭個世界多眼美好和諧個畫面。
“阿姨爺叔慢慢走”也是一句雙關語。人老了腳步放慢點，做事體覅急躁、覅焦慮，“只爭朝夕”讓撥年輕人。“慢慢站立再起跑，防止跌倒最重要。”走好！首先要有自知之明，審時度勢立穩當，行穩致遠更重要。同樣講做人，要保持晚節，勿要被利益誘惑，凡事三思，勿要沖動，更勿要自毀形象。老了就應該有老人個腔調。儂看心態好了，幸事盡找不老翁，人生百歲勿是夢。但愿秋天里個“阿姨爺叔慢慢走”！
原載：2023年9月24日《新民晚報》
（配圖來源：網絡）
