三門灣鄉音
從讀音及變調習慣上來看，廣義三門話的區域遠遠大于今之三門縣域。寧海、象山的南部區域，臨海東部諸鎮及椒北地區，甚至天臺東鄉區域，這么一大片范圍內的語言相似度極高，這也是本公眾號名為“三門灣鄉音”的原因。
吳語三門話譯讀的經典文學作品。如覺可以，請幫忙點贊，謝謝！
阿Q正傳
第八章 不準革命
未莊個人心一日比一日安穩爻。聽人家傳，革命黨進城也無何物不樣，縣老爺還是縣老爺，聽講謳法不樣爻；舉人老爺也何物當的——箇絡名堂，未莊個人也講不清爽——便連帶兵個頭頭都樣。便只有樣事干（勿會）好：有幾個歪個人夾革命黨里頭搗亂，第二日便動手剪頭發辮，聽講隔壁村撐船個七斤便撞著，頭發辮一剪，望來便不像人范爻。當然，箇事干也不?猛，未莊個人本來得城里也不去猛，便算兩個要去，也辦法忖來，撞不著。阿Q本來也想進城尋弟兄家，聽著箇事干，也便算數爻。
未莊也無之講沒有改革。隔兩日，畀頭發辮盤頭的個人便多起來爻。頭前便講過，秀才公頂早盤，接落去寔趙司晨對趙白眼，落腳寔阿Q。得講在六月，大勢家畀頭發辮盤頭的也好，打結也好，都不算稀奇。箇且都立冬了，還“秋行夏令”，箇幫盤頭發辮個人也老實果決，也無之講未莊同改革無關。
趙司晨后司ie3空蕩蕩走來，望著個人都叫起來：
“哦唷，革命黨來爻！”
阿Q聽爻便死記掛。渠識寔識得秀才盤頭發辮個大新聞，便無忖著自家也好箇子做，且望趙司晨也箇子，且忖著學樣，決心去做。渠用一梗竹箸畀頭發辮盤頭頂的，一昶捱爻，且有膽走出去。
渠走得街的，人家望也在的望渠，話都不講，畀渠裝來（勿會）舒服猛，落晏便得知唣脹脹。渠間脾氣（勿會）好猛，也勿是講渠個生活比早孬過，人家見渠也客氣，店的不收現鈿也無較。寔渠自家忖忖（勿會）心過：革命都革過爻，還是箇副范子。落腳望著小同，老便肚皮都氣炸爻。
小同也學渠樣，用竹箸畀頭發辮盤頭的。阿Q無忖著小同有膽學渠樣做，絕對不允許個事干。小同算何物唵？渠老想走過去畀渠捽牢定，箸扼斷，頭發辮放轉落來，悶頭摑摑兩摑湊，便當罰渠連生辰八字都記不牢，還有膽冒充革命黨。落腳渠還是算數，便眼舉轉來望渠，饞唾鹵吐口：“呸！”
箇兩日，便只假洋人進城過。趙秀才忖著舉人老爺還有箱囥渠屋里，也想借個事干親自上門拜訪，亦?頭發辮剪去爻，便無膽去。渠一封“黃傘格”個信寫來，托假洋人帶去，謳舉人老爺介紹記，好進自由黨。假洋人轉來，還問秀才討四塊洋鈿，秀才便在大襟上頭掛塊銀桃。
阿Q扣還（勿會）心過，也為受人冷落個事干難過，亦聽著人家在吤講箇銀桃，渠且忖著自家受人冷落個原因爻：要革命，單清講投降寔無較用個；單清盤頭發辮也無較用；便要對革命黨結交且好用。渠識得個革命黨便只兩個，城里箇個老早便“咔策”爻，且便剩假洋人。渠除趕快對假洋人劃算條路之外，便無別樣個路數爻。
錢府個大門扣開的，阿Q?jioehjioeh樣，腳都硬下梢爻。走得里頭，望著假洋人徛道地頭，一統烏黑個衣裳著的，對洋衣樣，身家也一塊銀桃掛的，手的梗棍阿Q也領教過，尺把長養來個頭發辮也解爻，披得肩胛頭止，蓬頭散發望來便對劉海仙樣。趙白眼對三個閑人在對頭筆直徛的，畢恭畢敬聽渠講。
阿Q輕輕個走得邊的，徛趙白眼后頭，想謳聲，亦不識得怎謳謳好：假洋人肯定無之謳，洋人也孬用，革命黨也不合適，要末便謳洋先生算數。
洋先生無相渠，眼瞎吤定講來扣味道。
“我人火冒性wae3，為之講，我每次對渠碰著，都講：洪哥，我伲動手唵！渠呢，長頭搖搖，講：No！——箇物寔洋話，你幫人識不得。不然我老早也成功爻唵。當然，箇也寔渠做事干小心。渠再三再四請我上湖北，我還無應落來。何人中意在箇小縣城做事干欸？”
“嗯，箇……”阿Q趁渠講歇爻，且十二分勇氣鼓出來講，也不識的為怎個，也無謳渠洋先生。
扣聽來味道個四個人頭都擂轉來望渠，洋先生也望著爻。
“裝何物唵？”
“我……”
“出去！”
“我要投……”
“滾出去！”洋先生畀梗哭喪棒挈來。
趙白眼對箇三個閑人都跟牢講渠：“先生謳你滾出去，你還不聽啊？”
阿Q手擋頭的，忖也無忖便逃出去爻，洋先生也無來追。渠快步六十多步逃爻，且慢慢時走走，肚里向便在的愁：洋先生不準渠革命，渠嚇無辦法爻。轉套也無辦法指望白盔白甲個人走來謳渠，渠所有個抱負、志向、希望、前程，全部一筆勾銷爻。傳出去讓小同、王胡幫人笑話，倒還寔其次。
渠從來無介無聊過。對于自家盤頭發辮，忖忖也無意思，有點望不起自家樣。為報假洋人個仇，是想畀頭發辮放轉落來，落后還是無放。渠蕩得天黑，兩碗酒賒來啜爻，慢慢時高興來，亦去忖白盔白甲爻。
箇日夜的，渠照樣混來遲猛遲，酒店關門了，且慢慢時蕩（thaon3）得老爺殿轉去。
啪。
驀丁頭箇一記響來，亦不像炮仗響。阿Q本來便中意趕鬧熱，閑事保長樣。渠朝個聲響摸過去，恰對有人在吤逃樣，渠扣頭側轉來聽聽，有個人望對頭箇一記逃過來。阿Q?tsae2來，也跟牢定逃。渠轉彎，阿Q也轉彎。渠徛的，阿Q也徛的。渠望望后頭無何物爻，且望出來箇個寔小同。
“裝何物嘞？”阿Q有點脹來爻。
“趙……趙家讓人搶爻！”小同氣敨呼呼聲。
阿Q聽爻心便卜卜跳。小同講完便走，阿Q逃逃停停，捱兩三次。渠早也做過箇行當，膽也格外大。渠輕手輕腳望路角沿出去，仔細聽聽，恰對有兩個人在的講樣。亦仔細望望，恰對蠻多白盔白甲個人樣，來來去去畀箱稱出去，家生伙頭也稱出來，連秀才老孺個寧式眠床也稱出去。渠想上前望望清爽點湊，結果腳拔不動。
箇一夜月亮也沒有，未莊在箇暗夜里向得知唣靜靜，靜來便對羲皇箇時節介太平。阿Q徛的望煩來，望來望去都寔老樣子，人在吤搬來搬去，箱稱出來，家生伙頭稱出來，秀才老孺個寧式眠床也稱出來……阿Q都有點不相信自家個眼睛爻。渠忖忖（勿會）望算數，轉的自家個老爺殿去爻。
老爺殿里向越發鐵墨爛洞黑爻。渠畀大門關好，摸得自家間里，一昶眠爻，心且平轉落來，開始有渠自家個忖法爻：白盔白甲個人明明來爻，也不對渠打招呼，介多物事搬去，亦無渠個份。都寔假洋人歪，不準我造反，不然何里無我個份呢？阿Q越忖越氣，也越忖越惡毒，頭一點，講：“不準我造反，便只你好造反啊？你姨個假洋人。好唵，你造反！造反寔要殺頭，我早遲要畀你告爻，望你不揢去殺頭呶，滿門抄斬，策！策！”
